भद्रवती प्रतिनिधी/ जावेद शेख:-
भद्रावती तालुक्यातील मौजा आष्टा शेतशिवारात रविवारी (दि. 26 एप्रिल 2026) सायंकाळी भीषण दुर्घटना घडली. ट्रॅक्टरची पलटी झालेली ट्रॉली सरळ करत असताना लोखंडी सळाखीचा उच्चदाब वीजताराशी संपर्क आल्याने एका तरुणाचा जागीच मृत्यू झाला, तर दुसरा गंभीर जखमी झाला आहे.
मिळालेल्या माहितीनुसार, पारोधी रोडवरील शेतात दिपक शंभरकर यांचा मातीने भरलेला ट्रॅक्टर ट्रॉलीसह पलटी झाला होता. यावेळी त्यांचा मुलगा सूरज दिपक शंभरकर (वय अंदाजे 27 वर्ष) व मजूर अक्षय शामदेव कापटे (वय अंदाजे 27 वर्ष, रा. शेगाव खुर्द) हे ट्रॉली सरळ करण्याचा प्रयत्न करत होते.
ट्रॉली उचलण्यासाठी वापरण्यात येत असलेली लोखंडी सळाख जोराने ओढताना ती थेट वरच्या वीजताराला लागली. क्षणात जोरदार विद्युत प्रवाह झाल्याने दोघेही दूर फेकले गेले. या भीषण घटनेत अक्षय कापटे यांचा जागीच मृत्यू झाला, तर सूरज शंभरकर गंभीर जखमी झाला.
घटना पाहणाऱ्या प्रत्यक्षदर्शी विजय तिवाडे यांनी तत्काळ सरपंच चांगदेव रोडे यांना माहिती दिली. स्थानिक ग्रामस्थांनी तातडीने जखमी सूरज शंभरकर याला चंदनखेडा येथील शासकीय रुग्णालयात उपचारासाठी दाखल केले.
दरम्यान, मृतदेहाबाबत पोलिसांना कळविण्यात आले असून पुढील तपास शेगांव बू पोलीस करत आहेत.
0 comments:
Post a Comment