कोरपना प्रतिनिधी :
कोरपना तालुक्यातील गडचांदूर येथे असलेला माणिकगड सिमेंट प्रकल्प (सध्या अल्ट्राटेक सिमेंट) पुन्हा एकदा वादाच्या भोवऱ्यात सापडला आहे. सार्वजनिक रस्त्यावर गेट उभारून त्याला ताळे ठोकण्यात आल्याने स्थानिक नागरिकांमध्ये तीव्र संतापाची भावना निर्माण झाली आहे. तसेच कंपनीकडून जमिनीवर अतिक्रमण करून तारेचे कुंपण उभारल्याचेही आरोप करण्यात येत आहेत.
Public roads were blocked by installing gates; serious allegations of encroachment against Manikgad Cement
गेल्या काही महिन्यांपासून गडचांदूर परिसरात वायू व धूळ प्रदूषणामुळे नागरिक त्रस्त आहेत. दुर्गंधीयुक्त वायूमुळे अनेकांच्या आरोग्यावर परिणाम झाला असून याविरोधात नागरिकांनी आंदोलनही केले होते. याच पार्श्वभूमीवर आता रस्त्याच्या प्रश्नामुळे परिस्थिती अधिक चिघळली आहे.
माहितीनुसार, कुसुंबी येथील चुनखडी खाणीसाठी 1981 साली शासनाने सुमारे 643.62 हेक्टर जमीन लीजवर कंपनीला दिली होती. या करारामध्ये संबंधित रस्ता सार्वजनिक असल्याचे स्पष्ट नमूद असून, या मार्गावर नागरिकांना ये-जा करण्याचा हक्क आहे. हा रस्ता निजामकालापासून वापरात असल्याचेही सांगितले जाते.
तथापि, कंपनीने शंकरमूर्ती परिसरात हा रस्ता खाजगी असल्याचे दर्शवणारे फलक लावले आणि अनेक ठिकाणी गेट उभारले. विशेष म्हणजे, 7 जुलै 2020 रोजी तत्कालीन तहसीलदार, राजुरा यांनी हा रस्ता सार्वजनिक असल्याचा आदेश देत अडथळे हटवण्याचे निर्देश दिले होते. काही काळ कंपनीने आदेशाचे पालन केले, मात्र आता पुन्हा गेटला ताळे ठोकून नागरिकांची ये-जा रोखली जात आहे.
यामुळे 10 ते 12 गावांतील नागरिकांना मोठ्या प्रमाणावर अडचणींचा सामना करावा लागत आहे. गेट क्रमांक 1 व 3 बंद केल्यामुळे वाहतुकीवर परिणाम झाला आहे. याशिवाय, कंपनीकडून लिंगेडोह परिसरात परवानगीशिवाय सिमेंट काँक्रिट खांब व लोखंडी तारेचे कुंपण उभारून अतिक्रमण केल्याचा आरोपही स्थानिकांनी केला आहे.
नागरिकांनी 30 मेपर्यंत गेट पूर्णपणे खुले करण्याची मागणी केली असून, अतिक्रमण हटवून पर्यायी सुरक्षा व्यवस्था उभारावी, अशी मागणी जोर धरत आहे. तसेच, या प्रकरणात जिल्हाधिकारी व तहसीलदार यांच्याकडे शिष्टमंडळ भेट देऊन तक्रार सादर करण्यात येणार असल्याची माहिती जनसत्याग्रह संघटनेचे अध्यक्ष आबिद अली यांनी दिली.
यावेळी अरुण उडे, सुनील पेंदोर, जंगू आत्राम, भाऊराव कन्नाके, केशव कुडमेथे आदी उपस्थित होते.
निष्कर्ष :
सार्वजनिक रस्त्यावर गेट लावून अडथळा निर्माण करणे व जमिनीवर अतिक्रमण केल्याचे गंभीर आरोप समोर आल्याने प्रशासनाने तातडीने हस्तक्षेप करून नागरिकांना न्याय देण्याची गरज व्यक्त होत आहे.
0 comments:
Post a Comment