चंद्रपूर | प्रतिनिधी
चंद्रपूर महानगरपालिकेतील काँग्रेसच्या गटनेतेपदावरून सुरू झालेला राजकीय संघर्ष आता केवळ पदापुरता मर्यादित राहिलेला नाही, तर तो थेट प्रतिष्ठेच्या लढाईत परिवर्तित होत असल्याचे चित्र समोर येत आहे. गटनेतेपदाची खुर्ची, समर्थक नगरसेवकांची भूमिका आणि आता पक्ष कार्यालयातील छायाचित्रांची अदलाबदल, या घटनांमुळे काँग्रेसमधील अंतर्गत मतभेद पुन्हा एकदा चर्चेच्या केंद्रस्थानी आले आहेत.
खासदार प्रतिभा धानोरकर यांच्या समर्थक नगरसेवकांनी आमदार विजय वडेट्टीवार समर्थक राजेश अडूर यांना गटनेतेपदावरून हटवून त्यांच्या जागी सुरेश अडबाले यांची नियुक्ती केली होती. या निर्णयामुळे महानगरपालिकेतील काँग्रेसच्या राजकारणात नवा संघर्ष उभा राहिला. मात्र, विभागीय आयुक्तांकडे बहुमत सिद्ध करण्याच्या प्रक्रियेनंतर राजेश अडूर यांना पुन्हा गटनेतेपद मिळाल्याने राजकीय समीकरणांनी अनपेक्षित वळण घेतले.
यानंतर पक्ष कार्यालयातील राजकीय घडामोडींनाही वेग आला. गटनेतेपदाची खुर्ची गमावल्यानंतर हटविण्यात आलेले छायाचित्र पुन्हा भिंतीवर लावण्यात आल्याची घटना चर्चेचा विषय ठरली आहे. छायाचित्रांची ही अदलाबदल केवळ औपचारिक बाब आहे की त्यामागे राजकीय संदेश दडलेला आहे, असा प्रश्न उपस्थित केला जात आहे.
छायाचित्रांवरूनही प्रतिष्ठेची लढाई!
या संपूर्ण घडामोडीत सर्वाधिक लक्ष वेधून घेत आहे ते म्हणजे नेत्यांच्या छायाचित्रांवरून निर्माण झालेला वाद. गटनेतेपदाच्या बदलानंतर छायाचित्र हटविणे आणि पुन्हा गटनेतेपद मिळाल्यानंतर तेच छायाचित्र सन्मानाने भिंतीवर लावणे, या घटनांमधून काँग्रेसमधील अंतर्गत राजकीय संघर्षाचे वेगळेच दर्शन घडत आहे.
नेत्यांमध्ये मनोमिलन झाल्याचे दावे केले जात असले, तरी समर्थकांमधील नाराजी आणि मनभेद अद्याप पूर्णपणे मिटले नसल्याचे या घडामोडींवरून दिसून येते. वडेट्टीवार गटाकडून राजकीय समीकरणे सांभाळण्याचे प्रयत्न सुरू असतानाच अडूर यांना गटनेतेपदी कायम ठेवण्याच्या निर्णयामुळे स्थानिक राजकारणात चर्चांना उधाण आले आहे.
नेत्यांचे मनोमिलन की केवळ राजकीय तडजोड?
एका बाजूला पक्षातील वरिष्ठ नेते एकजुटीचा संदेश देत असताना दुसऱ्या बाजूला समर्थकांच्या पातळीवर सुरू असलेली रस्सीखेच अनेक प्रश्न निर्माण करीत आहे. पक्षातील अंतर्गत मतभेद मिटले असतील, तर छायाचित्रांच्या माध्यमातून निर्माण झालेला हा वाद नेमका कशाचा संकेत देतो? आणि आगामी महापालिका राजकारणात या गटबाजीचा परिणाम काय होणार, याकडे राजकीय वर्तुळाचे लक्ष लागले आहे.
काँग्रेसमध्ये एकीकडे एकजुटीचे दावे आणि दुसरीकडे पद, प्रतिष्ठा व समर्थकांच्या वर्चस्वाची लढाई सुरू असल्याचे चित्र आहे. त्यामुळे चंद्रपूर काँग्रेसमधील हा संघर्ष आता केवळ गटनेतेपदाचा राहिलेला नसून पक्षांतर्गत शक्तिप्रदर्शनाचा विषय बनत चालला आहे.
आता प्रश्न एवढाच — काँग्रेसमध्ये खरोखर मनोमिलन झाले आहे की छायाचित्रे पुन्हा भिंतीवर लागली, पण मनातील अंतर कायम आहे?
0 comments:
Post a Comment