जावेद शेख भद्रावती प्रतिनिधी,वरोरा:
वरोरा तालुक्यातील उखर्डा ते उखर्डा पाटी रस्त्याची अत्यंत भीषण आणि दयनीय अवस्था झाली असून संपूर्ण रस्ता खड्डेमय झाला आहे. रस्त्यात खड्डा की खड्ड्यात रस्ता, अशी स्थिती निर्माण झाली असून हा रस्ता मुख्य मार्ग आहे की एखादी शेतातली पांदण वाट, असा संतप्त सवाल नागरिक विचारत आहेत. या मार्गावरील खड्ड्यांमुळे दररोज छोटे-मोठे अपघात घडत असून प्रवाशांना कंबरदुखीसह प्रचंड शारीरिक व मानसिक त्रासाला सामोरे जावे लागत आहे.
Pathetic condition of Ukharda to Ukharda Pati road; Villagers angry at 'Kumbhakarni' management of public representatives and administration!
गेल्या ५ ते ६ वर्षांपासून या रस्त्याची सातत्याने दुरवस्था झालेली आहे. तरीही गेंड्याच्या कातडीचे प्रशासन आणि कुंभकर्णी झोपेत असलेले लोकप्रतिनिधी याकडे साफ दुर्लक्ष करत आहेत. लोकप्रतिनिधींना सामान्य जनतेच्या जिवाची साधी पर्वा उरलेली नाही, असा जोरदार आरोप करत युवा नेते अभिजित कुडे यांनी प्रशासनाविरोधात आक्रमक भूमिका घेतली आहे.
विविध आंदोलने करूनही प्रशासन बेफिकीर
या रस्त्याच्या दुरुस्तीसाठी आजवर भजन आंदोलन, दिवे लावा आंदोलन, रस्त्यावरील खड्ड्यांमध्ये झाडे लावा आंदोलन आणि प्रशासनाची झोप उडवण्यासाठी 'झोपा काढून' आंदोलन अशा अनेक नाविन्यपूर्ण व तीव्र मार्गाने आंदोलने करण्यात आली. स्थानिक नागरिकांनी सार्वजनिक बांधकाम विभागाला वारंवार निवेदने दिली, तरीही निर्लज्ज सार्वजनिक बांधकाम विभाग व संबंधित अधिकारी डोळ्यावर झापडे ओढून बसले आहेत.
कामगार अन् विद्यार्थ्यांचे हाल; संतापाचा उद्रेक!
हा रस्ता या परिसरातील अत्यंत महत्त्वाचा मुख्य मार्ग आहे. या रस्त्यावरून दररोज मोठ्या संख्येने नागरिक, शाळकरी मुले, महाविद्यालयीन विद्यार्थी आणि स्थानिक कंपन्यांमध्ये कामाला जाणारे कामगार ये-जा करतात. परंतु खड्डेमय रस्त्यामुळे कंपनीत जाणाऱ्या तरुणांना आणि नागरिकांना नाहक भयंकर त्रास सहन करावा लागत आहे. खासदार असोत वा आमदार, सर्वच लोकप्रतिनिधी या समस्येकडे पूर्णपणे दुर्लक्ष करून झोपेचे सोंग घेत आहेत.
"आता अजिबात सहन करणार नाही!" – अभिजित कुडे यांचा थेट इशारा
"गेल्या ६ वर्षांपासून उखर्डा परिसरातील जनता या नरकयातना सहन करत आहे. प्रशासनाला लोकांच्या प्राणाची किंमत राहिलेली नाही का? आम्ही शांततेच्या मार्गाने निवेदने दिली, सर्व प्रकारची आंदोलने केली. मात्र आता नागरिकांच्या सहनशीलतेचा अंत झाला आहे. यापुढे आम्ही एकही दिवस हा अन्याय सहन करणार नाही. जर तातडीने या रस्त्याचे पक्के काम सुरू झाले नाही, तर लोकप्रतिनिधी आणि बांधकाम विभागाच्या अधिकाऱ्यांना रस्त्यावर उतरून गाठू व लोकशाही मार्गाने तीव्र धडा शिकवू!"
— अभिजित कुडे
रस्त्याची ही भीषण अवस्था पाहता आता उखर्डा परिसरातील नागरिकांमध्ये प्रचंड संतापाची लाट पसरली आहे. प्रशासन आतातरी कुंभकर्णी झोपेतून जागे होऊन या रस्त्याचे काम हाती घेणार की आणखी एखाद्या मोठ्या अपघाताची प्रतीक्षा करणार, असा परखड सवाल जनता विचारत आहे.
0 comments:
Post a Comment