राजुरा, दि.२१ नोव्हेंबर
विद्यार्थ्यांचा सर्वांगीण विकास साधण्यासाठी केवळ पुस्तकी ज्ञान पुरेसे नसून प्रत्यक्ष जीवनातील अनुभवातून शिक्षण मिळणेही तितकेच महत्त्वाचे आहे. याच संकल्पनेतून "शिकूया व्यवहारातून, वाढवूया आरोग्याची जाणीव आणि घडवूया प्लास्टिकमुक्त हरित भविष्य!" या उद्देशाने ब्लॅक डायमंड इंटरनॅशनल प्री-स्कूल, राजुरा येथे शनिवार, दिनांक २१ नोव्हेंबर रोजी भाजीपाला, फळे व मोड आलेल्या कडधान्यांचा विशेष बाजार उपक्रम उत्साहात संपन्न झाला.A market full of toddlers; lessons on health and environmental conservation along with practical knowledge! या उपक्रमाचे उद्घाटन शाळेचे सेंटर डायरेक्टर अॅड. मनोज काकडे, शाखा प्रमुख सीमा आमटे आणि उपस्थित पालकांच्या हस्ते करण्यात आले. लहान वयातच विद्यार्थ्यांमध्ये व्यवहारज्ञान, आत्मविश्वास, संवाद कौशल्य आणि आर्थिक साक्षरता विकसित व्हावी, हा या उपक्रमाचा मुख्य उद्देश होता. यानिमित्ताने चिमुकल्या विद्यार्थ्यांनी विविध प्रकारच्या ताज्या भाज्या, रंगीबेरंगी फळे आणि पौष्टिक मोड आलेल्या कडधान्यांची मांडणी करून बाजाराचा प्रत्यक्ष अनुभव घेतला. विविध फळे व भाज्यांची नावे, रंग, आकार आणि त्यांचे आरोग्यदायी फायदे यांची माहितीही विद्यार्थ्यांना देण्यात आली. या उपक्रमाचे विशेष आकर्षण म्हणजे पालकांचा उत्स्फूर्त सहभाग. पालकांनी विद्यार्थ्यांकडून विविध वस्तूंची खरेदी करून त्यांना प्रोत्साहन दिले. यामुळे चिमुकल्या विक्रेत्यांच्या चेहऱ्यावर आनंद आणि उत्साह ओसंडून वाहत होता. वस्तूंची निवड करणे, किंमत सांगणे, पैशांची देवाणघेवाण करणे, पैशांचा योग्य वापर करणे आणि ग्राहकांशी नम्रपणे संवाद साधणे अशा महत्त्वपूर्ण जीवनोपयोगी कौशल्यांचा अनुभव विद्यार्थ्यांना मिळाला. तसेच आधुनिक तंत्रज्ञानाची ओळख करून देताना UPI द्वारे डिजिटल पेमेंटविषयीही माहिती देण्यात आली. केवळ व्यवहारज्ञानच नव्हे, तर पर्यावरण संवर्धनाचाही महत्त्वपूर्ण संदेश या उपक्रमातून देण्यात आला. प्लास्टिक पिशव्यांमुळे पर्यावरणाचे होणारे नुकसान लक्षात घेता प्लास्टिकचा वापर टाळून कापडी पिशव्या व इतर पर्यावरणपूरक पर्यायांचा वापर करण्याचे आवाहन करण्यात आले. विद्यार्थ्यांमध्ये स्वच्छता, आरोग्य आणि प्लास्टिकमुक्त जीवनशैलीची जाणीव निर्माण करण्याचा स्तुत्य प्रयत्न यावेळी करण्यात आला. खेळता-खेळता शिकणे आणि प्रत्यक्ष अनुभवातून ज्ञान आत्मसात करणे, या शैक्षणिक दृष्टिकोनाला या उपक्रमातून उत्तम प्रतिसाद मिळाला. विद्यार्थ्यांची निरीक्षणशक्ती, निर्णयक्षमता, सामाजिक जाणीव, आत्मविश्वास आणि व्यवहारकुशलता विकसित होण्यास हा उपक्रम निश्चितच पूरक ठरला. या उपक्रमाच्या यशस्वी आयोजनाचे श्रेय शाखा प्रमुख सीमा आमटे यांनी शाळेचे सल्लागार सदस्य तथा संस्थेचे उपाध्यक्ष संदीप मालेकर, सहसचिव जयश्री मालेकर, विधाता फाउंडेशनच्या अध्यक्षा शुभांगी धोटे आणि सचिव अॅड. मनोज काकडे यांना दिले.
तसेच उपक्रमाची संकल्पना उत्कृष्टरीत्या साकार करण्यासाठी शिक्षकवृंद आलीशा सय्यद, प्रणाली डांगे, कस्तुरी रागीट, भाग्यश्री मेंढे, मोनिका चव्हाण, करिश्मा ढवस, कांचन यदनूरवर तसेच शिक्षकेतर कर्मचाऱ्यांनी विशेष परिश्रम घेतले.
पालकांचा उत्स्फूर्त प्रतिसाद, विद्यार्थ्यांचा आनंद आणि शिक्षकांचे उत्तम नियोजन यामुळे हा बाजार उपक्रम केवळ शैक्षणिक उपक्रम न राहता व्यवहारज्ञान, आरोग्यजागरूकता आणि पर्यावरण संवर्धनाचा सुंदर संगम ठरला.
0 comments:
Post a Comment